Du goosch, ich bi muusbäieläi

D Liebi flügt allpott verbii
(Nur) So nöch isch si no nie gsii
Liecht und langsam und so frei
Ha immer nume schpekuliert
Falsch bliib falsch ich has kapiert
Du goosch, ich bi muusbäieläi

Fabeltier am Himmel obe
D Liebi dur de Cacao zoge
Ohni Gfüel grad wie en Schtäi
Nur damoll isch es andersch gloffe
Du häsch direkt is Schwarzi troffe
Du goosch, ich bi muusbäieläi

Wildi Runggle und Wisechlee
Rooti Hoor vo wiitem z gsee
Du kennsch es nid bisch au nid do dihei
Was han ich mir nur tänkt debi
Wie chame so verdorbe sii
Du goosch, ich bi muusbäieläi

Blueme blüed satt am Südhang
Überall ghörsch Grillegsang
En blaue Fluss flüüst fuul und langsam
Ich wett es wäri mit üs niemols verbii

E gueti Schtimmig chasch nid chaufe
Beziehige sind übel glaufe
Verlaine und Rimbaud – bitte nei
So chames würklch nid vergliiche
Chasch nid eifach d Sägel striiche
Du goosch, ich bi muusbäieläi

Wies wiiter goot isch mir e Rätsel
So ooni dich und ganz elei
Wies wiiter goot ich chas nid säge
Red mit mir sälber, bliib dihei

Ich suech noch dir im alte Rom,
z Hamburg z Mailand um de Dom,
Du zupfsch en hüt und ich bi frei
Mir wärded üs no eimol gsee,
bi Neumoond und im schwarze Schnee  –
Du goosch, ich bi muusbäieläi

 

© Christoph Bürgin, pomeranzenmusik.ch