Fischerboot

Ich wett ich hett e Fischerboot
Uf däm schpiegelglatte See
Äifach so chli triibe loo
Und d Wält mit Fischerauge gsee

Im Morgenäbel äifach looszie
Bis d Sunne äntlich chunt
Am Ufer käi Bewegig
En Motor, wo vo wiitem liislig brummt

Me säit, e sone Fischerboot
Sei wäiss Gott käi groossi Sach
Chli Farb, chli Teer, en Ligeplatz
Und für de Winter bruuchts e Tach

Jetz sitz ich i mim Fischerboot
Uf däm schpiegelglatte See
S bruucht Gält und Muet und au chli Glück
Mä mues sichs mängmol äifach nee