Schturmwaarnig

Es chunt es Gwitter, es chunt en Schturm
Es schmöckt scho schträng und ich wäiss au worum
Händ vill z lang züüslet und Grümpel verbrännt
Sind uf Sache gschtoosse wo niemer gäärn kännt

Schturmwaarnig – dusse wirds düschter
Schturmwaarnig – und mir sitzed im Trochne
Schturmwaarnig, d Luft isch zum Schniide
Schturmwaarnig, s mag nümme vill liide

Di äinte säged, si wüsseds scho lang
Di andre mäined jetz sig Wältundergang
Die würed au noch em letschte Schilfroor griiffe
Us em gmachte Näscht isch guet pfiiffe

S wird immer tunkler, s wäit en chaalte Wind
Guet, da mir jetz im warme Schärme sind
Ich gsee vier Riiter und de Wind hudlet d Äscht
Si häissed Tood, Chrieg, Hunger und Päscht

Wo simmer doo gschtrandet und wär isch debii
Ir faltsche Profeete, lönd s Predige sii
S verloore Paradiis isch e gueti Gschicht
en Trooscht uf em Wääg zum Jüngschte Gricht

E Schturmwaarnig im Summer
En Schneeschturm im Mai
Dräi Täg im ene Föönloch
Und dä ganz Tag uf de Bäi 

Es chunt es Gwitter, es chunt en Schturm
Es schmöckt scho schträng und ich wäiss au worum
Händ vill z lang züüslet und Grümpel verbrännt
Sind uf Sache gschtoosse wo niemer gäärn kännt

Schturmwaarnig – dusse wirds düschter
Schturmwaarnig – und mir sitzed im Trochne
Schturmwaarnig – dusse wirds frisch
Schturmwaarnig – en Schnaps uf de Tisch

© Christoph Bürgin, pomeranzenmusik.ch