Trumpfschpiil

Puur hät kei Gäld
Niemerd git ihm nüüt
Puur hät en Plan
Drum brucht de Puur Lüüt

E Bank uf em Land
Und niened Bolizei
Ohni Gäld ine
Riich wider hei

Wär hilft im Puur
Wär isch au debii
Die Häre Ass und König
Falled ihm ii

Ass isch gärn de Boss
genau da bruucht er nid
De König macht uf adlig
Zellt aber nüüt

Si schpiled s Trumpfschpiil
En tüüfe zfridne Schnuuf
Jetzt bisch de Trumpfpuur
Wiegsch alli König uf
Nimm au no s Näll dezue
Und eu schtoht alles offe
Z zweite unschlagbar
Z dritte unübertroffe

Ober oder Banner
Ein obedra ein unne
Wele macht mit und
Wele luegt i d Sunne

De Ober isch en Seckel
En gröötige Siech
De Banner traat im Wind
Wa au nid jede miech

Ass isch jetz debii
Es Ass chunt mit
De Puur hät zvill gschnoret
Nur drum sinds jetz z dritt

Niemerd darfs erfahre
Nur so chas glinge
D Mannschaft isch verläse
Morn wänds alli bringe

Am nöchschte Morge
Knackeds die Bank
Packed s Gäld zäme
Lääred jede Schrank

En gschtolene Schlitte
Schtoht für si parat
Herr Ass sitzt am Schtüür
Zum Fluss goot die Faart

Jetzt en Schprung is Wasser
Aber s Ass will devoo
Und d Helfti vom Schtutz
Als abgmachte Loo

Es Ass will au nid schwimme
Nid mol nassi Händ
Puur und Näll versäufeds drum
So nimmt die Gschicht es Änd

 

 

 

© Christoph Bürgin, pomeranzenmusik.ch